अपूर्व न्यूज समाचारदाता ।
जनकपुर,१३ पुस । मधेश प्रदेश सरकारकाे मातहतका आमसञ्चार प्राधिकरणले प्रदेशका क्रियाशील पत्रकारहरूको स्वास्थ्य र दुर्घटना बीमा सुनिश्चित गर्न ठूलो कदम उठाएको हाे।

शुक्रबार प्रदेश सरकारको गृह, सञ्चार तथा कानून मन्त्रालय अन्तर्गतको आमसञ्चार प्राधिकरणले प्रदेशभर क्रियाशील रहेका पत्रकारहरूको लागि स्वास्थ्य र दुर्घटना बीमा सम्झौता गरेको हो।

सम्झौता अनुसार प्रत्येक पत्रकारको लागि १ लाख रुपैयाँको स्वास्थ्य बीमा र ७ लाख रुपैयाँको दुर्घटना बीमा गरिनेछ।

जनकपुरधामस्थित भौतिक पूर्वाधार विकास मन्त्रालयमा आयोजित कार्यक्रममा सम्झौतामा हस्ताक्षर गरिएको हो। राष्ट्रिय बीमा कम्पनीका व्यवस्थापक देवराज घिमिरे र प्राधिकरणका निमित प्रशासकीय प्रमुख प्रसन्नराज कर्णले सम्झौतामा हस्ताक्षर गरेकाे हाे ।
गृह तथा सञ्चार मन्त्री राजकुमार लेखीले मधेश प्रदेश सरकारलाई सञ्चारमैत्री सरकारको रूपमा परिभाषित गर्दै, यो बीमा योजना पत्रकारहरूको सुरक्षा र स्वास्थ्यप्रति सरकारको प्रतिबद्धताको प्रमाण भएको बताए। मन्त्री लेखीले यस योजना निःशुल्क गरिएको र निकट भविष्यमा शहीद परिवारहरूको स्वास्थ्य बीमा समेत निःशुल्क गरिने जानकारी दिए।
कार्यक्रममा नेपाल पत्रकार महासंघका धनुषा अध्यक्ष पुरन साहले यो नीति स्वागत योग्य रहेको र यसलाई निरन्तरता दिन आग्रह गरे।

आमसञ्चार प्राधिकरणका अध्यक्ष श्यामसुन्दर यादवले,भने-तीन वर्षदेखि निरन्तर पत्रकारितामा क्रियाशील रहेका करिब ८ सय पत्रकारहरूको बीमा नेपाल पत्रकार महासंघ वा सम्बन्धित मिडियाको सिफारिसका आधारमा गरिनेछ ।

यस वर्षको चालु आर्थिक वर्षमा प्रदेश सरकारले यो परियोजनाका लागि ३० लाख रुपैयाँ बजेट विनियोजन गरेको छ। यसबाट पत्रकारहरूको स्वास्थ्य र सुरक्षामा ठूलो राहत पुग्ने अपेक्षा गरिएको छ।