अपूर्व न्यूज समाचारदाता ।
कञ्चनरुप (सप्तरी), १५ असार । जनमत पार्टीले कञ्चनरुप नगरपालिकाले बुझाइएको ज्ञापनपत्रप्रति निरन्तर बेवास्ता देखाएको आरोप लगाउँदै गम्भीर असन्तोष व्यक्त गरेको हाे।
जनमत पार्टीले नगर प्रमुख ललन प्रसाद गुप्ता र प्रमुख प्रशासकीय अधिकृत नवराज खड्काले ज्ञापन बुझाएको १० दिन बितिसक्दा पनि कुनै औपचारिक प्रतिक्रिया नदिएकोप्रति आपत्ति जनाइएको हो।
गत असार ४ गते बुधबार जनमत पार्टीका नगर अध्यक्ष मनोज कुमार शाहको नेतृत्वमा रहेको प्रतिनिधिमण्डल जसमा केन्द्रीय सदस्य शिवनन्दन कुशवाहा, उप–मेयर पदकी उम्मेदवार सम्झना राणा मगर चौधरी, मुकेश मैरता र विदयानन्द सिंहलगायत सहभागी थिए । जनमत पार्टीले नगरपालिकालाई १० बुँदे ज्ञापनपत्र बुझाएको थियो। तर अहिलेसम्म न नगर प्रमुख न त प्रमुख प्रशासकीय अधिकृतबाट कुनै औपचारिक प्रतिक्रिया प्राप्त भएको छैन।
जनमत पार्टीका नगर युवा अध्यक्ष मोहम्मद कालूले,भने- प्रमुख प्रशासकीय अधिकृत खड्काले असार १६ गते साँझ ४ बजेसम्म १० मध्ये ९ बुँदामा लिखित जवाफ दिने प्रतिबद्धता जनाए पनि त्यसअघि नगरपालिकाको मौनता अस्वीकार्य रहेको बताइएको हाे ।
साे ज्ञापनपत्रमा उल्लेख गरिएका मुद्दामध्ये एक महत्वपूर्ण विषय कञ्चनपुर नगर अस्पतालमा केही वर्षअघि उपचारको क्रममा मृत्यु भएका ओमप्रकाश खङ्गका परिवारलाई क्षतिपूर्ति उपलब्ध गराउने सम्बन्धमा थियो। यस विषयमा नगर प्रमुख गुप्ता र प्रशासकीय अधिकृत खड्काले सर्वदलीय बैठक तथा कार्यपालिकाको निर्णयपछि मात्रै कारबाही अघि बढाइने बताएका थिए।
जनताको मागमा ढिलासुस्ती : जनमतको आन्दोलनको संकेत
साे जनमत पार्टीले नगरपालिका प्रशासनको ढिलासुस्ती, असंवेदनशीलता र जवाफदेहिताको अभावप्रति गम्भीर चिन्ता व्यक्त गर्दै छिटो निर्णय गरी जनतालाई स्पष्ट जवाफ दिन माग गरेको छ। पार्टीले मागहरूमा शीघ्र सुनुवाइ नभए थप आन्दोलनका कार्यक्रम सार्वजनिक गरिने चेतावनीसमेत दिएको छ।
