अपूर्व न्यूज समाचारदाता ।
कञ्चनपुर, १० भाद्र । हिन्दु धर्मावलम्वीहरुको पर्व श्रीकृष्ण जन्माष्टमी आज देशभर मनाइँदै छ । आज भगवान श्रीकृष्णको श्रद्धा–भक्तिपूर्वक पूजा–आराधना गरी मनाइरहेका छन् ।

आज देशभरका विभिन्न प्रसिद्ध कृष्ण मन्दिरमा मेला लागेको छ । यसैगरी राजधानीका विभिन्न स्थानमा रहेका ठूला, साना श्रीकृष्ण मन्दिरमा पनि भक्तजनको भीड लाग्ने गर्छ ।

आज कृष्ण जन्माष्टमी पर्वकाे अबसरमा तराई मधेश जिल्लाका विराटनगर,राजविराज एवम् जनकपुर विभिन्न धार्मिक संघ संस्थाले झाँकीसहित शोभायात्रा तथा रथयात्रा निकाल्ने चलन छ ।

श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्ण जन्माष्टमी’ र रातलाई ‘मोहरात्रि’ भनिन्छ । यस दिन देशभरिका कृष्ण मन्दिरमा पूजा–आराधना, प्रवचन, भजनकीर्तन गर्नाका साथै विशेष गरी महिला, पुरुष व्रत बसी रातभर जाग्राम बस्ने प्रचलन छ ।
यस पर्वका अवसरमा सरकारले आज देशभर सार्वजनिक बिदा दिएको छ ।